Ao Cineclube de Compostela, entidade coa que programamos habitualmente esta sección na que damos a coñecer o patrimonio de diversas cinematografías e referentes do cinema etnográfico, este ano sumamos o apoio da sección de Artes Escénicas, Musicais e Audiovisuais do Consello da Cultura Galega.
O resultado é un programa constituído por unha xornada de debate e formación que coordinan a productora Beli Martínez e programador cultural e historiador de cinema José Manuel Sande, e tres sesións de proxeccións centradas no Cinema galego e Transición, continuando a liña temática desta 19 MICE.
programa da xORNADA DE DEBATE E FORMACIÓN
XOVES, 21 DE MARZO. ALA SUR DO MUSEO DO POBO GALEGO
A inscrición é gratuíta e pode realizarse nesta ligazón.
SESIÓN DE MAÑÁ
Poderá seguirse en liña a través desta ligazón.
11:00 h – presentación
11:15 h – SESIÓN-MESA 1: Cine afeccionado e militante da Transición
Participan: Xosé Xoán Cabanas Cao, Antón Caeiro e Xan Gómez Viñas. Modera: Ana Domínguez.
12:30 h – SESIÓN-MESA 2: Do AFECCIONADO ao profesional
Participan: Manuel Abad, Manolo Gonzalez e Milagros Bará. Modera: Marcos Gallego.
SESIÓN DE TARDE
Poderá seguirse en liña a través desta ligazón.
16:30 h – SESIÓN-MESA 3: Representación da Transición no cinema contemporáneo
Participan: Eloy Enciso, José Manuel Sande, Coral Piñeiro. Modera: Beli Martínez.
PROXECCIÓNS
SESIÓN 1. MÉRCORES, 20 DE MARZO, 22H. TEATRO PRINCIPAL
Entradas no despacho de billetes da Zona C e, desde 1 hora antes da proxección, no Teatro Principal.
CONXO, UNHA EXPERIENCIA
Manuel Abad
Galicia – España, 1977
12 min. VO
Filmación dun Happening do grupo A Carón que tivo lugar no psiquiátrico santiagués de Conxo, e supuxo unha reflexión arredor da creación artística, a enfermidade mental e a sociedade, á vez que unha denuncia das pésimas condicións nas que vivían os internos, algúns dos cales, grazas a unha tímida liberación da ciencia médica, puideron participar no acto.
CCCV
Ramiro Ledo Cordeiro
Galicia – España, 2005
67 min. VO
Carlos Varela percorreu Galiza enteira coa súa cámara de cinema para facer a crónica do movemento nacional-popular galego, mais deixou tamén unha estela exemplar no eido da fotografía, na cerámica, no debuxo, no deseño gráfico, no mural, no traballo cos tapices; elaborou o anteproxecto de estatutos para unha futura Federación de Cineclubes de Galiza en 1977 (que tomou forma definitiva en 1984), fundou e dirixiu en 1975 ‘Nós Cinematográfica Galega’ e deseñou o anagrama desta sociedade que, nos seus estatutos fundacionais, defendía a “incorporación á cultura galega do fenómeno cinematográfico en todas as súas manifestacións”.
SESIÓN 2. XOVES, 21 DE MARZO, 18:00h. NUMAX
Entradas na web ou na billeteira de NUMAX.
A LEI DA TERRA
Colectivo Grupo Zero
Portugal, 1977
67 min. VO
O proceso da reforma agraria no Alentejo é visto a través dunha análise das estruturas sociais e da loita de clases, culminando coa ocupación de terras polos campesinos e pola tentativa de creación de novas relacións laborais e de propiedade. Fronte á sabotaxe económica dos patróns e antigos propietarios, os traballadores organízanse en sindicatos, reclaman emprego e salarios xustos e procuran establecer unha lei revolucionaria: “A terra para quen a traballa!”.
CURTAS MANOEL DA COSTA:
TEMPOS (DE) GRISES / HOMENAXE A DOLORES / VIGOSHIMA MON AMOUR
Manoel da Costa
Galicia – España, 1975-1985
30 min. VO
Estes tres filmes tratan temas políticos mediante a filmación de conflitos sociais e populares na Transición Española. Manifestacións, represión policial, e homenaxes a políticos comunistas exiliados na dictadura danse cita nesta serie de curtametraxes filmadas polo cineasta amateur Manoel da Costa cunha cámara de S8.
SESIÓN 3. venres, 22 DE MARZO, 20:00H. salón teatro
Entradas no despacho de billetes da Zona C e, desde 1 hora antes da proxección, no Teatro Principal.
Esta terceira sesión contará coa presentación e coloquio posterior á proxección con Alejandro Alvarado, cineasta, docente e investigador, autor de ‘La postcensura en el cine documental de la transición española’ (2018). Con el indagaremos no contexto do cinema daquel período histórico e nos procesos de censura que sufriron filmes como Rocío.
ALEJANDRO ALVARADO (Málaga, 1975). Cineasta, docente e investigador. Como profesional compaxinou a televisión cultural e divulgativa, como director-realizador do programa ‘Tesis’ (2001-11) de Canal 2 Andalucía. Forma tándem creativo con Concha Barquero, coa que escribiu e dirixiu varias películas, entre as que destaca Pepe el andaluz (2012). Desde 2010 é profesor do Departamento de Comunicación Audiovisual e Publicidade da Universidade de Málaga, onde imparte a materia Produción Documental e coordina o Máster en Creación Audiovisual e Artes Escénicas. Desde 2014 forma parte do comité de selección da sección de curtametraxes do Festival de Málaga.
Os filmes que se proxectarán e sobre os que xirará a posterior conversa serán:
ROCÍO
Fernando Ruiz Vergara
España, 1980
69 min. VOSG/SpX
O censurado documental Rocío trata as bases económicas, de clase e de poder que subxacen na devoción rocieira, alienando toda unha comarca. Documento histórico que expón breve pero concisamente a penetración e evolución do catolicismo en España durante o golpe de estado e o franquismo, a razón e lóxica da fe mariana, así como a aparición das imaxes de virxes ao longo e ancho do país para centrarse na Virxe do Rocío.
ANDALUCÍA 28F
Nonio Parejo
España, 1981
15 min. VO
Unha curtametraxe documental sobre a celebración do Referendo pola Autonomía, que votou o pobo andaluz o 28 de febreiro de 1980.