Sección coordinada por Ainhoa Rodríguez
Nun contexto como o das Ciencias Sociais donde o discurso dominante é o androcéntrico, e no mundo da cinematografía, no que a presenza de mulleres directoras en festivais conta aínda con desigualdades, a organización da MICE considera que é necesario reforzar a presenza do cine realizado e/ou producido por mulleres. A sección é así un convite de carta branca para mulleres profesionais do mundo do cinema e do audiovisual que programen filmes realizados por directoras.
Nesta edición aceptou o noso convite Ainhoa Rodríguez, cineasta e docente, directora da premiada Destello Bravío, o debut revelación do cine español desta década. A que é a súa primeira longametraxe de ficción foi galardonada no Festival de Málaga 2021, gañando o Premio do Xurado Biznaga de Plata e o Biznaga de Prata á Mellor Montaxe dentro da Sección Oficial. Ademais, fíxose co Premio Dunia Ayaso no Festival Internacional de Cine de San Sebastián e o Premio á Mellor Película no Festival Internacional de Cine de Burgas (Bulgaria), así como o Premio á Mejor Película no Shorts de Trieste (Italia).
Como directora, Ainhoa gañou os premios a Mellor Dirección no 26 Festival Internacional de Cine de Vilnius (Lituania), no 23 Festival Internacional de Cine de Mulleres de Seúl (Corea do Sur) e o Violette D’Or no Festival Cinespaña Toulose, entre outros.
Ainhoa é doutora en Teoría e Análise Cinematográficas pola Universidad Complutense de Madrid. Ten o DEA na área de coñecemento de Comunicación Audiovisual e Publicidade. Tamén é licenciada en Comunicación Audiovisual (UCM) e diplomada en Dirección de Cine e Produción de Televisión (TAI). A revista “Variety” destacouna como unha das dez cineastas emerxentes TALENTOS ESPAÑOLES EN AUGE, no que respecta ao Mercado do Cine Europeo da Berlinale 2021. Compaxina o seu traballo como directora co traballo de profesora e locutora de linguaxe cinematográfica en universidades e institucións públicas e privadas. Do mesmo xeito que realiza proxectos audiovisuais inmersivos con perspectivas feministas e non normativas no rural.
destello bravío
Xoves, 16 de marzo, ás 20h30 en Numax.
2021 I 98 min I España
Dirección: Ainhoa Rodríguez
Reparto: Isabel María Mendoza, Guadalupe Gutiérrez, Carmen Valverde, Isabel Valverde, Isabel María Giraldo, Petra Parejo, Valentina Jiménez.
O filme baséase no documental para narrar a vida nunha pequena comunidade extremeña e as fascinantes persoas que alí habitan. Gañadora no Festival de Málaga da Biznaga de Plata, Premio do Xurado e Mellor Montaxe.
Destello bravío está protagonizada por non actrices, mulleres rurais de diferentes idades, vellas, novas, que non seguen patróns normativos de físico perfecto porque teñen caras reais, corpos reais. Fan visible o natural, o cotián, algo que non adoita ser “a norma”. Levan ao traballo a súa verdade emocional.
“Vai pasar un fulgor bravío, todo vai cambiar…”, Isa fálase a si mesma deixándose mensaxes na súa gravadora para cando desapareza ou perda a memoria. Cita séntese atrapada nun matrimonio e nunha casa chea de santos e virxes. María regresa á poboación onde naceu para afrontar a súa soidade. As mulleres desta pequena localidade rural, suspendida no tempo e e que sofre o problema da despoboación, viven entre a apatía cotiá onde nada extraordinario ocorre, e un profundo desexo de experiencias liberadoras que as leven ao lugar onde foron felices ou soñaron selo.
Ao rematar a proxección: Q and A: Ainhoa Rodríguez e A Cuarta Parede
Para a sección, Ainhoa Rodríguez escolleu dous filmes: Cow de Andrea Arnold e ElDorado XXI de Salomé Lamas.
cow
Venres, 17 de marzo, ás 22h en Numax
94′ | 2021 | Reino Unido
Andrea Arnold
Andrea Arnold é unha directora independente cunha filmografía moi particular que, mesmo rodando unha longametraxe sen adornos sobre unha vaca, produce unha obra fantástica. Cow foi presentada no Festival de Cannes.
O filme é unha iniciativa para ter en conta as vacas. Achegarse a elas. Ver a súa beleza e o reto da súa existencia. Non dun xeito romántico, senón dun xeito realista. É unha película sobre a vida cotiá dunha vaca e un agradecemento polo enorme servizo que nos brinda. “Cando miro a Luma, a nosa vaca, vexo nela todo o mundo”.
Eldorado XXI
Sábado, 18 de marzo, ás 18h en Numax
2016 I 125 min I Portugal
Salomé Lamas
Eldorado XXI é un misterioso e inquietante documental etnográfico, gravado no asentamento humano máis alto do mundo, La Rinconada e Cerro Lunar, a 5.100 metros sobre o nivel do mar, nos Andes peruanos. As infernais condicións de vida arredor da mina fúndense cos rituais para rematar en transo, entre a sobriedade da cámara, os intrincados testemuños da xente do lugar, a música cativadora, e a folla de coca. Unha busca entolecida das riquezas inalcanzables de El Dorado que no século XXI conserva as súas raíces ancestrais, incluíndo a febre do ouro e o sacrificio humano.