Santiago, a 14 de marzo de 2025.- A estrea de Resonancias, da cineasta e investigadora Diana Gonçalves inaugura nesta vixésima edición da MICE a sección oficial a concurso dedicada ao cinema galego. Hoxe, ás 20:30 horas, o Teatro Principal acollerá a proxección desta peza que parte dun interrogante: como facer para que un lugar non che resulte estraño nin indiferente? Con esa premisa, a directora achégase a San Sadurniño buscando elementos familiares para superar a súa sensación de estrañamento, un fío do que tirar. O filme convértese nunha exploración do universo compartido e descoñecido da Lusofonía nunha aldea allea realizada por unha cineasta da fronteira separada en ese momento 220 km da súa patria da infancia.
Seguidamente, tamén no Principal proxectarase o filme Aurora, de Area Erina. Un documental rodado ao longo de máis de dez anos, no que dúas mulleres achegadas de mundos totalmente diferentes e cunha gran diferencia de idade entre elas, Aurora e Area, traban una forte relación de intimidade, confianza e conversacións profundas ligadas á morte, a familia, a guerra e as mulleres.
Outros dous filmes con selo galego participan na sección oficial desta 20 MICE: Memoria de Soutelo, de Xoán Bregua, e Corre o vento, de Paula Fuentes e Guillermo Cabrera, que poderán verse o sábado a partir das 20:30 horas tamén no Teatro Principal. Na primeira peza, Candela volve a Soutelo de Montes para afondar no retrato fotográfico da vila feito por Virxilio Viéitez a medidados do século XX; mentres que a obra de Xoán Bregua condúcenos até a Vila do Courel, unha pequena aldea que leva décadas resistíndose á desaparición.
As catro producións galegas, que serán accesibles para persoas xordas, competirán polo Premio AGANTRO á excelencia antropolóxica xunto con outras 9 obras de diferentes nacionalidades.
Novas cineastas, etnografía e perspectiva de xénero
No capítulo da 20 MICE máis orientado ao público profesional, este venres, 14 de marzo, ás 16:30 horas, terá lugar na Ala Sur do Museo unha mesa redonda conducida pola antropóloga Bibiana Martínez para afondar na etnografía realizada por novas cineastas e con perspectiva de xénero. A cita, de acceso libre, contará coa participación de Adriana P. Villanueva e Sabela Iglesias, integrantes de Illa Bufarda; Mirian Opazo, artista visual que investiga e explora a través do audiovisual temas como a tradición, o rural ou a memoria; e Laura Piñeiro, cuxo traballo se focaliza no cinema independente galego.
Ademais, nesta terceira xornada da MICE continuarán as proxeccións para escolares, na MICE Petís; e dos filmes incluídos nas seccións Internacional, Trazas e Impropias, esta última coa presenza da cineasta letoa Laila Pakalnina.
MICE en liña
Ademais, até este domingo, 16 de marzo, está dispoñible a MICE en liña, para visionado online dos filmes premiados na anterior edición da Mostra: Taxibol, de Tommaso Santambrogio, Mellor Filme na 19 MICE; Flotacija, de Eluned Zoe Aiano, Alesandra Tatić, Mención especial; e Habitar, de Anxos Fazáns, Mellor Filme Galego na 19 MICE.
Sedes do festival e información práctica
O Museo do Pobo Galego, o Teatro Principal e NUMAX abeiran as proxeccións e actividades desta edición, con entrada gratuíta.
Resumo da programación da 20 MICE para este venres, 14 de marzo:
