Sesión inaugural

A MICE inaugurará a súa vixésima edición coa presentación da copia dixitalizada do filme fundacional do cinema galego O carro e o home.

A cinta orixinal foi realizada en 1940 con guión de Xaquín Lorenzo, Xocas, e Antonio Román. O filme é un relato da vida do carro como un símbolo da cultura material tradicional galega. Unha obra fortemente influenciada polo cinema soviético e o traballo de Flaherty na que os actores e actrices son os veciños da aldea de Facós, no concello ourensán de Lobeira de onde era Xocas. 

En 1980, o etnógrafo ourensán xunto co cineasta Eloy Lozano e co patrocinio do Museo do Pobo Galego, fixo unha nova montaxe cunha sonorización menos folclorizada  e con texto e locución do propio Xocas. Esta segunda versión, recén dixitalizada coa colaboración de AGADIC e a Filmoteca de Galicia, protagonizará a apertura da MICE, nun acto de homenaxe ás persoas que iniciaron a cinematografía galega e que viron no cinema un xeito de colaborar co patrimonio cultural do país. 

A proxección contará coa participación de Pepe Coira, historiador do cinema galego e coñecedor do filme e da obra dos seus artífices.