- A 16ª edición da Mostra Internacional de Cinema Etnográfico celebrarase do 6 ao 10 de abril de 2021 en Santiago de Compostela.
- O prazo de inscrición estará aberto dende hoxe ata o 8 de xaneiro de 2021 a través de tres plataformas: Clickforfestivals, FestHome e Filmfreeway.
- A MICE conta co apoio de AGADIC, da Xunta de Galicia, daDeputación da Coruña e do Concello de Santiago.
Santiago de Compostela, 19 de novembro de 2020. – A Mostra Internacional de Cinema Etnográfico do Museo do Pobo Galego, que se desenvolverá entre o 6 e o 10 de abril de 2021, abre o prazo para a presentación de filmes que serán seleccionados para concursar na Sección Oficial da XVI edición da mostra.
As películas que poderán concorrer á MICE deberán ter sido producidas con posterioridade ao 1 de xaneiro de 2018. O prazo de admisión de filmes estará aberto dende hoxe, día 19 de novembro, ata o vindeiro 8 de xaneiro de 2021ás 23.59h, a través das plataformas Clickforfestivals, Filmfreeway e FestHome. A MICE conta co apoio de AGADIC, da Xunta de Galicia, da Deputación da Coruña e do Concello de Santiago.
O Museo do Pobo Galego promove a Mostra Internacional de Cinema Etnográfico co fin de achegar o cine etnográfico e a antropoloxía audiovisual ao público, entendendo o cinema etnográfico como unha ferramenta de investigación, comunicación e creación, no ámbito da representación da diversidade cultural. Busca xerar un espazo de diálogo e intercambio arredor de filmes que mostren aspectos relacionados coas distintas realidades socioculturais, tendo como foco principal as persoas, os grupos sociais ou os procesos históricos relevantes relacionados coa antropoloxía e a etnografía.
PREMIOS
As películas que resulten elixidas para concurso optarán ao Premio ao Mellor Filme Etnográfico, dotado con 1000 euros, trofeo e diploma. As películas galegas seleccionadas a concurso optarán tamén ao Premio ao Mellor Filme Etnográfico Galego, dotado con 700 euros, trofeo e diploma. O Premio do público consistirá nun diploma e trofeo acreditativo. Por último, o Premio AGANTRO premiará a excelencia antropolóxica e será outorgado pola Asociación Galega de Antropoloxía Social e Cultural, dotado con 500 euros, diploma e trofeo.
