Santiago de Compostela, luns 17 de agosto de 2020. – A 15ª edición da Mostra Internacional de Cinema Etnográfico – Museo do Pobo Galego, que terá lugar do 25 ao 29 de agosto en Santiago, reuniu esta mañá na súa presentación á concelleira responsable de Acción Cultural de Santiago de Compostela, Mercedes Rosón; Jacobo Sutil, director da Agadic;Xurxo Couto, deputado responsable da Área de Cultura da Deputación da Coruña e Ana Estévez, directora da Mostra.
Mercedes Rosón, concelleira responsable de Acción Cultural, destacou que para o Concello de Santiago,»é esencial dar espazo a iniciativas tan interesantes como a MICE e ao cinema etnográfico, proxecto e disciplina que non atopan oco nas programacións máis comerciais». A Mostra Internacional de Cinema Etnográfico recolle quince filmes a concurso coproducidos por dezaseis nacionalidades diferentes e nos que as obras de procedencia europea e asiática teñen especial relevancia. A selección ofrece un panorama completo de traballos audiovisuais feitos no campo da etnografía e a antropoloxía visual dos últimos dous anos. Algunhas destas películas chegan á MICE co respaldo de ter pasado por prestixiosos festivais como o Doclisboa (caso de Terra, de Hiroatsu Suzuki e Rossana Torres), o Tribeca’s Contemporary Art Fair (o filme 11,565 Kilometres Project, de Beichen Zhang) ou Cinéma du Réel (Hamada, do director galego Eloy Domínguez Serén). Dez dos quince filmes veranse por primeira vez en España e un terá nesta 15ª edición a súa estrea galega. Ana Estévez, directora da MICE, apuntou tamén que nesta edición de 2020, a mostra recibiu máis de 1.300 inscricións, das cales se fixo unha selección moi rica que trata temas sociais, culturais e persoais desde perspectivas distintas, que van dende o documental autoetnográfico (Au printemps tu verras), o traballo con material de arquivo (Research/Souvenir (Dialogues) ou a inserción da cineasta na comunidade (Quartier Nomade).
- En la boca de la mina, de Brandán Cerviño (Galicia – Cuba)
- Dende que chegou a luz, de Santiago Teijelo (Galicia)
- 11,565 Kilometres Project [Proxecto 11,565 quilómetros], de Beichen Zhang (EUA – China). Estrea en España.
- Au printemps tu verras [Na primavera verás], de Nicolas Gerifaud (Francia). Estrea en España
- Elohim Rotse Bayit [Deus merece unha casa], de Irit Shamgar (Israel). Estrea en España
- How about Having a Fascination of Mind [Que tal ter unha fascinación?], de Katti Jisuk Seo e Finnja Willner (Alemaña – Corea do Sur). Estrea en Galicia.
- Khatemeh, de Mehdi Zarei e Hadi Zarei (Irán). Estrea en España.
- Quartier nómade [Barrio nómade], de Alexandra Rice (Bélxica). Estrea en España.
- Hamada, de Eloy Domínguez Serén (Suecia – Noruega – Alemaña).
- Research / Souvenir (Dialogues) de Roger Horn (Sudáfrica – Cimbabue). Estrea en España.
- Sezon Sozveranija Pantov [Cando se desprende o terciopelo], de Galina Leontieva (Rusia). Estrea en España.
- Terra, de Hiroatsu Suzuki e Rossana Torres (Portugal) Estrea en España.
- Eu tamén necesito amar, de Antonio Caeiro (Galicia).
- Trilogia “Processi”: Episodi 1 (Processi) e 2 (Perturbazione Lucifero), de Adriana Ferrarese (Italia).
- Une nouvelle ère [Unha nova era], de Boris Svartzman (Francia – China). Estrea en España.
O xurado estará formado por Jorge Moreno (antropólogo, cineasta e director do proxecto Mapas de Memoria); Iván Cuevas (xornalista, filólogo e fundador do Cineclube de Compostela) e Xisela Franco (cineasta, documentalista e profesora). Eles farán entrega dos premios á Mellor Película e á Mellor Película Galega dotados con 1000 e 700 euros, respectivamente. Pola súa banda, a Asociación Galega de Antropoloxía, formado este ano por Bibiana Martínez, Carlos Diz e Joan Roura, entregará o premio AGANTRO á excelencia antropolóxica cun premio dotado con 500 euros e trofeo. Os e as asistentes tamén outorgará o premio do Público. Para esta edición, na que se poderá ver parte da programación en liña, habilitarase un sistema de votación por internet.
Por mor da nova situación sanitaria, a MICE presenta este ano un «formato de difusión online e presencial en diferentes puntos da cidade, na que o público asistente estará nun entorno seguro, con protocolos de seguridade e prazas reducidas», apuntou Jacobo Sutil, director de AGADIC. Sutil tamén fixo fincapé en que a administración seguirá apoiando ao sector audiovisual como xa o fixo coas modificacións realizadas na parte de festivais do Plan de reactivación dos sectores cultural e turístico. A MICE combinará proxeccións en liña dos filmes internacionais cos pases presenciais dos filmes galegos a concurso na Sección Oficial. Nesta edición, a creación audiovisual galega está composta porEu tamén necesito amar de Antonio Caeiro, a xa mencionada Hamada, de Eloy Domínguez e as curtas En la boca de la mina de Brandán Cerviño e Dende que chegou a luz deSantiago Teijelo. Unha presenza galega que se estende ao resto da programación fóra da competición na sección Cinema Bonaval coa estrea en Galicia de Xoves de comadres de Noemi Chantada, logo do seu pase polo Festival de Málaga, ou a primicia do documental Dorothé na Vila, de Alejandro Gándara e Olaia Tubío, o xoves 27 ás 22h00 da noite.Unha película que segue os pasos, corenta anos despois, da musicóloga suíza Dorothé Schubarth na súa viaxe por Galicia a finais dos 70 para atopar as voces que recolleu e descubrir as súas historias de vida.
Por outra banda, Xurxo Couto, deputado responsable da Área de Cultura da Deputación da Coruña, recalcou que a MICE “é un festival singular que valora a lingua, a memoria histórica, que lle ofrece aos e ás espectadoras un cinema desde e para unha sociedade máis universal». Tamén destacou a visibilización das miradas das realizadoras, no que máis dun 50% das películas que se proxectan na MICE están realizadas por mulleres.
A directora da 15ª MICE, Ana Estévez, afondou na programación da Mostra destacando que a programación non competitiva recupera, na medida do posible, as liñas temáticas que ían centrar as seccións Trazas e Impropias, adiadas ao 2021: a oralidade e a memoria histórica e das mulleres. Nestas proxeccións, agrupadas no Parque Bonaval, pasaranse Las Cinéphilas, da arxentina María Álvarez, documental premiado no OUFF de 2017; De monstruos y faldas, da realizadora e docente Carolina Astudillo; ou Santa Baia de Montes, a primeira curta da ourensá Sabela Souto. Por último, Estévez recalcou «o carácter gratuíto das proxeccións e o reparto da programación en diferentes espazos». As entradas para as sesións de NUMAX poderán retirarse previamente dende hoxe, luns 17 de agosto pola tarde, na súa billeteira. As sesións do Museo do Pobo Galego e do Cinema Bonaval poderán retirarse online a través da aplicación Vivetix.
A MICE Petís, unha visita guiada á exposición ‘As pequenas cousas’ e un concerto pechan a programación da mostra
O público familiar e infantil de 7 anos en diante poderá acudir á programación presencial nas mañás do mércores 26 e xoves 27 de agosto o Museo do Pobo Galego. A sección MICE Petís ofrecerá unha sesión de catro curtas para o público máis novo seleccionadas por Marcos Nine (realizador e director artístico do festival Cinema Crianza). Tamén haberá programación en liña a través da canle de Youtube e a oportunidade de realizar un obradoiro de xoguetes ópticos e zoótropos no Vimeo do Museo do Pobo Galego coa asociación Espacio Rojo.
Na mañá do sábado 29 de agosto ás 11h00 realizarase unha visita guiada á exposición temporal ‘As Pequenas Cousas’ da man dun dos seus comisarios Jorge Moreno Andrés. Esta edición da MICE trouxo por primeira vez a Galicia esta mostra, iniciativa de Mapas de Memoria, recolle documentos, cartas e obxectos de persoas que foron perseguidas e represaliadas polo franquismo. A exposición, que estará aberta ao público ata o 20 de setembro, trata a memoria histórica pensada e construída dende a antropoloxía visual.
O sábado tamén terá lugar a actuación de Richi Casás no Claustro do Museo do Pobo Galego como peche á entrega de premios da MICE. A súa música conecta as raíces do tradición galega coas do jazz e está moi vencellada ás gravacións que a musicóloga Dorothé Schubarth fixo na súa Cerceda natal. Para esta sesión vermú, Casás vén cun formato reducido e íntimo acompañado da guitarra de Fran G. Galán. O concerto será de aforo limitado previa retirada de entrada.
